Pregunta: Bringamentu den deporte ta un señal ku nos moralidat ta bayendo atras?

 Awe mi a kore yega un wega di baseball. Tres generashon den outo, pa pasa un ratu dushi na felt. Ora nos a yega, pa mi sorpresa security a wak den outo prome ku nos por a pasa. Na e momentu ey mi a realisa ku esaki kasi sigur ta konsekuensia di e bringamentunan ku tin e lastu tempunan aki na nos weganan di deporte.  Esaki ta lanta e pregunta, dikon tantu violensia den deporte? Dikon nos ta partisipa òf hasta wak deporte?

Deporte ta bai mas leu ku solamente e fisiko. E ta bai mas leu ku solamente laga bo kurpa hasi kosnan fisiko, e ta mental tambe. Kuantu forsa mental un persona mester tin pa e sigi mehora den su deporte. Banda di esey, deporte ta un kos sosial kaminda bo ta traha un relashon uniko ku bo kolegnan deportista pasombra huntu komo un team bosnan ta logra. 

Kiko e logro aki ta? Ora nos ta praktika deporte, e rango di mas haltu ku nos por yega ta partisipashon den weganan olimpiko. E weganan olimpiko a kuminsa komo un akto di solidaridat, pa selebra un union entre e fisiko, spiritualidat i mental. Den e añanan weganan olimpiko a krese i kibra yen barera positivo, manera e inklushon di hende muhé den weganan olimpiko, para-olympics i mas. 

Pues, ta na unda violensia a bira parti di deporte, violensia di bishitante i tambe deportista. Ora nos kuminsa ku kibra loke deporte ta para pe, e ta kuminsa refleha riba nos sosiedat. Kaminda ku moralnan ta bai perdí i nos ta laga violensia kibra nos spiritu i traha negativamente riba nos salú mental. 

Quotes from: https://olympics.com/ioc/beyond-the-games