Pregunta: Bo ta kere mester stòp ku selebrashon di Sinterklaas.

 Temporada di Sinterklaas ta biniendo anto muchanan a kuminsa papia kaba di e regalunan ku nan ke. E tablet ku nan lo haña, pòpchi, chukulati ku pepernoten. Aunke den e mesun rosea nan ta bira wak bo i puntra si zwarte piet ta bini atrobe na skol paso e parti ey nan no ta gusta. 

Desèmber a habri anto ata mi ta buskando sapatu paso e luna aki ta yen fiesta. Un mucha ta para wak mi duru den kara pero mi no ta wòri pasombra ta mucha. Despues di un ratu mi ta tende e mucha puntra su mama, Mama, is dat Zwarte Piet? E mama no ta bisa nada, e ta kue e mucha bai kune. 

E historia di e San Nikolas ta sali for di e pastor Nicolas ku tabata biba na Turkije. Aki nan ela bin fayese riba 6 di Desèmber. No sa ki dia ela nase, p'esey ta selebra su dia di fayesimentu. Su restunan a wòrdu hiba pa Spanje ora a  kere ku nan lo wòrdu vandalisá. Varios pais tabata selebra e fiesta di San Nikolas pero a kita for di esaki dor di motibunan religioso òf dor di kontroversia ku rasismo. 

Hulanda ta selebra e fiesta di San Nikolas i a trese e kustumber aki na Kòrsou. 

Hopi ta keda selebra e tradishon aki paso e ta un fiesta pa mucha. Pero kuantu daño e fiesta aki no ta hasi? E ta un selebrashon ora nos ta hunga ku e mente di nos muchanan. "Bo ta haña regalu pero prome ku esey bo mester alaba e personanan aki ku ta duna bo miedu. "

E mucha ku ta yama un adulto Zwarte Piet, e ta bai skol bai yama bo yu Zwarte Piet? 

Kon largu nos mes, un pueblo kolonisá, ta sigi selebra un fiesta ku ta pinta nos komo e persona, bisti komo payaso, ku ta sirbi e mener blanku ku si ta bon pasombra ta e ta trese regalu, tanten ku e Piet ta esun ku ta straf i ku ta hinka miedu den mucha?