Preshon riba edukashon

 Bo ta haña tin hopi preshon riba nos muchanan na skol?

Na kleuter e muchanan ta hunga, nan ta klùr, plak, kòrta, skùr, hunga ku blòki. Esaki no tabata pa nan djis hunga, pero esaki ta pa nan desaroya nan "fijne" i "grove" motoriek. Ku esaki nan por siña skibi awero, nan ta siña konsentra i generalmente traha riba nan basis pa nan por sigi desaroya.

Aworaki den grupo 1 i grupo 2, e muchanan mester siña number, lèter i hasi relato di buki pa awero den grupo 3 nan tin problema ku skibi.

Den "eerste klas" a siña skibi den skreft spesial ku e papel ku strepi skuin pa asina yuda e muchanan pa desaroya un "schrijfgewoonte".  

Aworaki den grupo 3 e muchanan mes mester wak kon nan ta hasi.

Na basis school a siña e muchanan tur kos den klas, pa asina na kas nan por sigi desaroya emoshonalmente i duna nan tempu pa nan ta mucha i hunga. 

Aworaki e muchanan ta bai kas ku "huiswerk" i e tempu pa ta mucha ta den e ora prome ku mayornan bin buska nan na opvang. I na kas, nan desaroya sosial i tempu ku mayor ta den e minütnan despues ku kontrola "huiswerk" i ta prepara pa bai drumi.

Tin tantu proyekto ku e muchanan mester traha, ku ta kai bèk riba mayor, paso nos sa ku un mucha di 6 aña no ta bai traha un brùg òf prepara pa su turno oral. Pues dikon nos ta duna nan e tareanan ey?

Ora kaba basisschool, a traha gecoordineerd proefwerk ku ta determiná kua nivel ta bai. Aworaki tin asina tantu preshon pa e muchanan pasa toets bon pasombra ta miho pa tur mucha bai HAVO tanten nos sa ku tin no ta logra anto nos ta lubida ku VSBO tambe ta bon, paso tin hende su kaminda ta mas largu pero esey no kemen ku nan no ta logra. 

Anto kiko e mucha mes ta eksperiensia? E lagrimanan riba dia di "uitslag" mes ta papia pa nan mes. Dikon nos ta pone tur e preshon riba nos muchanan? Kiko a kambia, dikon muchanan mester por i hasi mas ku antes? Kiko nos ke logra? Kontra di ken nos ta komparando nos mes, paso na Hulanda no tin e preshon aki.

Si ta asina ku e muchanan mester sa mas, dikon no ahusta orarionan di skol pa asina duna e mucha e espasio pa siña den klas bou di guia di maestro. Mayoria maestro tin "huiswerkbegelieding" òf naschoolse opvang, dus e no ta kita for di nan ora. 

Laga nos ban restruktura nos edukashon, pa asina kita e preshon riba nos muchanan. Laga nan disfruta di nan karera edukashonal pa ora nan yega "voortgezet" nan no hana "mental breakdown" i nan sigi nan karera ku animo.